Agter elke suksesverhaal is daar die opofferings om die droom te verwesenlik, beginsels wat die openbare en private aspek van lewens beheer, die vermoë om ‘n eenmalige oorwinning in ‘n suksesresep te omskep, asook ‘n meedoënlose strewe na persoonlike groei. Iemand vertel, ‘As kind het ek gekyk hoe die mans dambord speel. Eendag het een van hulle my genooi om saam te speel. Aan die begin het dit maklik gelyk. Ek het een van sy skyfies afgeneem en toe nog een. Toe het hy skielik met een skyfie oor die hele bord gespring en geskree, ‘Kroon my!’ Met daardie ‘koning’ het hy my van die bord afgevee. Daardie ondervinding het my geleer wat langtermynvisie is. Niemand gee om om ‘n paar skyfies te verloor nie, solank hulle net na die ‘kroningsgebied’ op pad is!
Wat het Moses in die wildernes ondersteun? Sy visie! ‘Hy het volgehou soos iemand wat sy oog op die onsienlike gevestig hou.’ (Hebreërs 11:27). Niks kan jou laat deurdruk soos ‘n Godgegewe visie nie. Die Bybel sê, ‘Kyk reguit vorentoe; bly gefokus op wat voor jou is. Moenie links of regs van jou koers afwyk nie…’ (Spreuke 4:25-27). Wat sien jy in jou toekoms? Jy sal dit nooit kan aangryp alvorens jy dit nie sien nie! Teken jou visie en die rede waarom jy dit wil verwesenlik, aan, en wat jy bereid is om ter wille daarvan deur te maak. Teken dan elke uitdaging wat moontlik vir jou kan wag, aan. Op die manier sal jy goed voorbereid wees. Die verskil tussen wenners en verloorders is hoe hulle mislukking beskou. Verloorders sien mislukking; wenners kyk verder!
Bron : Radiokansel
