God bly in beheer

Die Golf Oorlog wat destyds erg (amper skryf ek “mooi”) aan die gang. As ek reg kan onthou was dit in die laat tagtigs. Ek kan die dag goed onthou en spesifiek waar ek ook geloop het die oomblik toe die gedagte waaroor ek wil gesels by my opgekom het.

Julle sal seker kan onthou dat die olievelde erg aan die brand gesteek is en dat die rookkombers selfs uit ‘n satellite sigbaar was. In hierdie tyd was daar so ‘n belewenis onder sekere Charismate oor die eindtyd.

Ek het gedink aan uitlatings oor die sonsverduistering wat deur die rook veroorsaak is. Hierdie verdonkering is geinterpreteer as die eindtyd (..en die son sal verduister), en so in my enigheid was dit vir my aan die eenkant vreesaanjaend, maar tog ook ander kant opwindend. As ek eintlik nou mooi daaraan dink dan herhinner ek myself aan die vrees wat ek soms ervaar het oor die Antichris, die merk van die dier, en dat ons nie sal kan handel dryf nie. Daar is baie goedjies wat steeds “op-pop” van tyd tot tyd en redelik bespreek word oor wat die eindtye vir ons inhou. Wel, ons is waarskynlik in die eindtye. Dalk is die eindtye nog ‘n verdere 1000 jaar?

Vrees oor die toekoms…

In Openbaring sal jy lees dat God wel sekere magte aan die vyand gee, maar nooit ooit is dit buite God se beheer nie. Hy besluit wie, wat, hoe en wanneer. Miskien is dit vir ons soms moeilik om verby die aardse bestaan te kyk. Ja, ons almal sien uit na die hemel, maar dalk begryp ons nie altyd regtig wat dit behels nie.

Kom ons bemoedig mekaar vandag met die wete en dit is; As God vir ons is, wie kan teen ons wees. Wie kan ons uit God se hand ruk. Wie kan ons van die liefde van God skei?

Niemand of niks nie!

Johann

Related Posts