Meeste van ons fokus ons lewe lank op ons inkomste. Tot ons voel ons tyd raak min, dán fokus ons op ons impak. Ongelukkig gaan jou besittings na ander wanneer jy sterf. Al wat oorbly is die impak wat jou lewe gehad het! Jy sal gedurende jou lewe 10,000 ander mense, direk of indirek, beïnvloed. Die kwessie is hoe jy hulle sal beïnvloed? Geld óf die gebrek daaraan beïnvloed nie noodwendig jou impak nie. Baie mense met groot fortuine het gelewe, doodgegaan en min of geen verskil gemaak nie. Maar ander met min geld, maar groot visie, het daartoe bygedra om die versugting van die Onse Vader te verwesenlik: ‘Laat u wil hier op aarde uitgevoer word soos in die hemel.’
Die Apostel Paulus het aan die einde van sy lewe geskryf, ‘…ek het die wenstreep bereik…’ (2 Timoteus 4:7 1983-Vertaling). Daarna het hy die bediening aan Timoteus oorgegee en na die laksman gestap. Hy is met sy dood natuurlik van sy pligte onthef, maar sy impak was groter as ooit. Hy skryf: ‘…God se grootheid deur ons bestaan verheerlik word…’ Watter soort bestaan? ‘n Verheerlikte bestaan! ‘n Lewe met impak!
Dustin Hoffman vertolk die rol van ‘n savant in die rolprent Rain Man. Dis iemand wat te midde van ‘n oseaan van gestremdheid een klein eiland van genialiteit het; in sý geval sy ongelooflike aanvoeling vir syfers. Ander savante het byvoorbeeld groot musiek- of kunstalente. Weet jy wat? Jy het ook ‘n eiland van genialiteit. God het aan jou ook ‘n talent gegee. Glo dit. Ontdek dit. Ontwikkel dit. Koester dit. Gebruik dit. Gee dit aan ander. Dit is verheerlikte bestaan!
Bron : Radiokansel
