Ruil jou probleme in

Party mense is so swartgallig dat hulle sommer al by die doodsberigte begin as hulle ‘n koerant optel (Nou ja, dalk werk hierdie beeld nie meer nie, aangesien doodsberigte tans die hoofberigte in ons dagblaaie is!). Tragies dat dit ‘n leefwyse geraak het om altyd eerste die slegte dinge raak te sien. Hoor hier, daar’s ‘n beter manier! Maak jou probleme Christus S’n, soos wat ons ook verlede keer in die Kernkrag vir mekaar gesê het. Hou op om jou laste self te dra. Jou skouers is nie breed genoeg hiervoor nie. Jy gaan struikel en val.

Volgens Matteus 11:27-30 bied Jesus jou die ruiltransaksie van ‘n leeftyd aan. Hy vra al jou bekommernisse en laste in ruil vir sy eie hemelse vrede. Het jy mooi gehoor? Jy kan jou probleme by Christus aflaai in ruil vir sy hemelse goedheid. Sy skouers is sterk genoeg vir jou nood, saam met dié van die res van die wêreld. Nou waarvoor wag jy? Gryp die kans van ‘n leeftyd aan om aan die regte soort vrede in jou lewe ‘n blyplek te gee. Dan verdwyn al daardie swartgalligheid en kommer wat dreig om jou te oorweldig soos mis voor die oggendson.

Stephan Joubert