Vandag sê God vir jou: “Terwyl ons besig is met die proses, moenie van die plan afwyk nie!” Niks kan God verras nie. Hy is die Meesterbeplanner. Josef het ontdek dat selfs wanneer jou gesin teen jou draai, jou vriende jou in die steek laat en jy in die moeilikheid is, het God steeds ‘n plan. Toe Josef teruggekyk het, kon hy sê: “Julle wou my kwaad aandoen, maar God wou daarmee goed doen,” (Gen. 50:20, NAV). As jou situasie te moeilik lyk om te hanteer en bloot onmoontlik om te verduidelik, herinner jouself aan wat God gesê het: “Ek weet wat Ek vir jou beplan.”
Party van ons is nie seker of God al besluit het of ons een van sy kinders is nie, dus probeer ons heeltyd om sy guns te wen. Hou op daarmee! Ontvang die waarheid dat God, om Christus ontwil, besluit het om jou te seën. En wanneer God ‘n besluit neem, laat geen tydelike situasies of dade van ander mense Hom van besluit verander nie. Daar is niks wat die vyand teen jou kan doen waarvoor God nie alreeds ‘n “uitweg roete” ontwerp het nie. Paulus skryf: “God is getrou. Hy sal nie toelaat dat julle bo julle kragte versoek word nie; as die versoeking kom, sal Hy ook die uitkoms gee, sodat julle dit kan weerstaan,” (1 Kor. 10:13, NAV).
Let op: (a) In moeilike tye sal jy uitvind hoe getrou God is; (b) Hy weet wat jy kan hanteer en (c) Hy sal “uitkoms” gee, sodat jy sterker aan die anderkant sal uitkom en gereed sal wees vir wat Hy volgende beplan.
Dus, moenie van die plan afwyk nie. Die feit dat jy ‘n probleem het, is ‘n teken dat jy ‘n belofte ontvang het. Wees net geduldig, God sal binnekort die oplossing aan jou gee!
© Radio Kansel 2008 (www.radiokansel.co.za)
