Moenie jou grense oorskry nie

Dit is belangrik dat jy vir jouself grense stel – en dit nie oorskry nie! Wysheid sê:

(1) Moenie eers een keer oor die streep gaan nie. Die eerste keer gaan jy vir jouself sê: “Net hierdie een keer.” Maar wat jy nie weet nie, is dat jy ‘n deur oopmaak wat jy dalk nie weer kan toemaak nie.

(2) Dit is makliker om die tweede keer oor te trap. Die man wat, terwyl sy vrou slaap, by die trappe afsluip om na pornografie op sy rekenaar te gaan kyk, ontdek spoedig dat hy, net soos enige verslaafde, ‘n groter dosis nodig het. Paulus het geskryf: “Julle weet tog: as julle julle aan iemand onderwerp . is julle die slawe van dié een,” (Rom. 6:16, NAV).

(3) Die streep raak al hoe dowwer. Jy hou aan om te pendel tussen reg en verkeerd, terwyl jy dink: “Ek kan ophou net wanneer ek wil,” en Satan fluister: “Ek het jou!”

(4) Op die ou end verdwyn die streep. Net soos die Verlore Seun, verloor jy alles. Geestelik verloor jy jou vertroue voor God. Persoonlik verloor jy jou sin van selfwaarde. In die openbaar verloor jy jou respek en invloed oor ander.

“Goeie” goed kan jou ook seermaak. Goeie werketiek is goed, maar as daar nie balans is nie, gaan jy jou gesin afskeep en gaan jou huwelik daaronder ly. Rus en ontspanning is goed, maar as jy te veel tyd op die bank voor die TV deurbring, gaan jou Geestelike groei stop. Omsigtigheid en sorgsaamheid is uitstekende kwaliteite, maar te veel daarvan gaan jou geloofsvlerke knip en jou daarvan weerhou om jou Godgegewe doel te vervul.

Stel dus goeie grense vir jouself op – en bly aan die regte kant daarvan!

© Radio Kansel 2008 (www.radiokansel.co.za)