As jy wys is, sal jy dikwels nadink oor wat jou tyd in beslag neem. Charles Swindoll skryf, ‘In…The Time Trap was ‘n lys van die mees algemene “tydverkwisters”. Dit het my gehelp om te bepaal watter spesifieke areas van onbekwaamheid ek moes dophou. Wie het nog nie die ware verhaal van Charles M. Schwab en Ivy Lee gehoor nie? Schwab was president van Bethlehem Steel. Lee, ‘n konsultant, het die uitdaging gekry, “Wys my hoe om my tyd beter te benut.” Schwab het onderneem om Lee ‘enige redelike’ vergoeding te betaal as sy voorstel sou werk. Lee het ‘n plan bedink: “Skryf die vernaamste take vir môre in volgorde van belangrikheid neer.
Wanneer jy by die werk aankom, begin dadelik met taak nommer een en hou daarmee aan totdat die werk voltooi is. Kyk weer na jou prioriteitslys en begin dan met taak nommer twee, dan nommer drie.
Maak dit jou en jou ondergeskiktes se gewoonte. Probeer hierdie metode so lank jy wil en betaal my dan wat jy dink dit werd is.”‘ Daardie een wenk het die Bethlehem Steel Korporasie binne vyf jaar in die grootste onafhanklike staalvervaardiger ter wêreld verander.
Hoeveel het Schwab sy konsultant betaal? ‘n Aantal weke na hy die plan ontvang het, het hy erken dat dit die beste wenk is wat hy ooit ontvang het en aan Lee ‘n tjek vir $25 000 (ongeveer R175 000) gestuur. Probeer dit self. As dit werk, goed. Moet my egter nie vir hierdie wenk betaal nie. Ek sal dit net op die volgende boek oor tydbestuur uitmors… een wat ek nie tyd het om te lees nie.’
Bron : Radiokansel
