Ken jy die storie van die Ierse man wat in Amerika aankom en sê: ‘As hier ‘n regering is, is ek daarteen wees’? Ons glimlag, maar ‘harde woorde laat woede ontvlam.’ Om konflik te vermy, moet jy dit nie aanblaas nie. Dis beter om empatie met mense te hê wat ontsteld is of wat van jou verskil. Jy hoef nie aan hulle giere toe te gee nie, maar as jy in jou standpunt glo, laat hulle staan om te wees wie hulle wil. As jy tevrede is met wie jy is, is dit onnodig om ander mense verkeerd te bewys sodat jy goed voel.
Almal sien dinge nie altyd soos jy nie; aanvaar maar ander het hul eie gedagtes, menings en gevoelens. Jesus het gesê: ‘Kom betyds tot ‘n skikking solank jy nog saam met hom op pad hof toe is’ (Mattheus 5:25 NV). ‘n Gesinsraadgewer sê: ‘In plaas van ‘n mondelinge aanval met ‘n soortgelyke teenaanval te probeer afweer, ontlont die situasie deur die ander mens se sigpunt te sien; so laat jy die aanvaller sonder ‘n teiken.’ Moet jy met almal saamstem? Nee, maar ‘As dit moontlik is…leef in vrede met alle mense’ (Romeine 12:18 NV).
Is daar tye dat jy jou posisie moet verdedig? Natuurlik, maar moenie heeltyd ‘n argument gaan uitlok nie. Party Christene is die grootste oortreders; omdat hulle glo hul saak is geregverdig, kan ander maar in die spervuur beland. ”n Verstandige mens beteuel sy humeur en stel sy eer daarin om vergewensgesind te wees’ (Spreuke 19:11 NV). Gun aan ander dieselfde genade as wat God jou betoon.
Bron: Radiokansel
