Selfone, skootrekenaars, palmrekenaars en elektroniese dagboeke kan slawedrywers word. Ons moet soms stilstaan en onsself afvra, ‘Kan God my onderbreek? Verg dit ‘n katastrofe om my aandag na Hóm te verskuif?’ Sommige van jou ‘God-belewenisse’ sal plaasvind terwyl jy met iets anders besig is. Bid dat jy ontvanklik sal wees en sal besef dit is God, sodat jy op Hóm kan reageer, eerder as op die druk van buite. As jy besluit om jou eie paadjie te volg, gaan alles waarskynlikin duie stort. Dinge sál verkeerd loop wanneer jy nie vir God tyd maak nie.
Toe Jesus die huis van Martha en Maria in Betanië besoek het, het Martha haar met die voorbereiding van die maaltyd vir Hom besig gehou; Maria het egter aan Sy lippe gehang. Albei optredes is natuurlik nodig, maar die Here sal altyd dié een wat met aanbidding aan sy voete sit en van Hom leer, kies. Luister na die Emmaüsgangers wat die opgestane Jesus ontmoet, maar Hom nie herken het nie: ‘”Was ons harte nie vuur en vlam in ons toe Hy met ons op pad gepraat en die Skrif vir ons geïnterpreteer het nie?”‘ (Lukas 24:32 NLV). God kan aan jou ‘n oplossing of strategie gee wat ‘n kantoor-probleem kan oplos. Hy kan jou laat ontspan sodat jy ‘n skooltoets met vlieënde vaandels slaag. Hy kan aan jou rigting vir die toekoms skenk, terwyl jy jou met beuselagtighede tuis besig hou. Al wat Hy vra, is dat jy ontvanklik en beskikbaar sal wees en op Hom sal reageer.
Bron : Radiokansel (Inhoud aangepas)
