Thomas Carlyle het sy buurman John Stuart Mill gevra om sy pas voltooide manuskrip oor die Franse Revolusie te lees. ‘n Erg geskokte Mill het later kom rapporteer dat sy huisbediende per ongeluk die manuskrip gebruik het om mee vuur te maak! Carlyle was op moedverloor se vlakte – twee jaar daarmee heen! Skryf was klaar ‘n groot uitdaging; herskryf was ondenkbaar. Toe hy egter een dag ‘n bouer dophou, het hy gemerk dat die muur een steen op ‘n slag hoër word. Dit was inspirasie en hy het besluit, ‘Ek sal vandag een bladsy skryf en more ook een. Een op ‘n slag; dis al waaraan ek sal dink.’ Dit was stadige, vermoeiende werk, maar hy het deurgedruk. Die resultaat was baie beter as die oorspronklike manuskrip.
Jon Gordon skryf, ‘As jy oor die toekoms bekommer…Ek weet hoe jy voel. Ek het my werk in 2001 verloor…die firma het vinniger as die Titanic gesink. Ek het gedink dit was die ergste gebeurtenis van my lewe. Bankrotskap was net twee maande weg. Ek het ‘n vrou en twee kinders gehad, ‘n huislening, geen mediese fonds nie, en baie min spaargeld. Net een salarisstrokie was tussen my en totale ondergang… en ek moes ingrypende besluite neem. Hierdie besluite het uiteindelik tot die werk wat ek nou as skrywer, konsultant en spreker doen, gelei. Afdanking het na my lewensroeping gelei…wat ek as die ergste beskou het…het op die beste uitgeloop… Wanneer die golwe ons omklits, kan ons kies…of ondergaan, of om hulle na ‘n beter toekoms te ry. Ons kan met vasberadenheid aanbeweeg en glo dat ons beste jare voorlê.’ Wees bly. Fokus opnuut. God kan ‘n vloek in seën verander.
Bron : Radiokansel
