Om nederig te wandel

Dink goed na oor die volgende woorde: “Om saam met God te wandel.” In Wie se geselskap is jy? In God se teenwoordigheid! Kan jy aan ’n hoër roeping dink? Tog – hoe hoër jou roeping is, hoe minder moet jy in jou eie oë word. Paulus het een van die grootste roepings gehad wat daar nog ooit op aarde was. Kan jy ’n wêreld indink sonder sy Briewe? Ons sou soveel minder geweet het oor hoe die kerk moet funksioneer, of hoe om elke dag in geloof te wandel. Tog het Paulus van homself gesê: “Christus Jesus het in die wêreld gekom om sondaars te verlos. Van hulle is ek die grootste,” (1 Tim. 1:15, NAV).

As jy glo dat God ’n groter doel met jou lewe het, moet jy op sy roeping reageer deur plat voor Hom neer te val. Dit is hoe elkeen van die groot mans en vroue van God in die Skrif gereageer het. Toe ’n Engel van die Here aan Sagaria verskyn en vir hom gesê het dat hy sy seun Johannes moet noem, het Sagaria met ’n slag op die vloer neergeval en nie beweeg nie, totdat die mense rondom hom gewonder het of hy dood is. Die profeet, Esegiël, het gesê dat hy in die teenwoordigheid van God, toe God die visioen aan hom gegee het, op die grond neergeval het. God moes hom beveel om op te staan deur te sê: “Mens, staan regop, Ek wil met jou praat,” (Eseg. 2:1, NAV). Toe Johannes, die skrywer van Openbaring, vir Jesus tussen die sewe kerke sien staan het, het hy geskryf: “Toe ek Hom sien, het ek by sy voete neergeval … soos een wat dood is,” (Op. 1:17, NAV).

Diegene wat hulself verhef, word deur God nederig gemaak. Diegene wat voor God nederig is, word deur Hom opgehef.

© 2007
Radiokansel. www.radiokansel.co.za