Daar word deesdae so baie oor self-help in die kerk gepraat, dat goddelike voorsienigheid skaars genoem word. Ons bepaal nie God se plan vir ons lewens nie, ons ontdek dit slegs. Ons verstaan selde die wyses waarop God ons lei. Dit is wanneer ons terugkyk dat ons die groter prentjie sien. Paulus het geskryf: Ek hoop om julle op my deurreis na Spanje te sien.” Maar hy het nooit so ver gekom nie. Hy het in een van Europa se aakligste tronke opgeëindig, vanwaar hy sy sendbriewe geskryf het. As ons opreg glo dat God in beheer van ons doen en late is – hoekom kla ons so baie?
Een van Engeland se begaafdste predikers het besluit dat sy vrou se swak gesondheid hom nie sou toelaat om ‘n groot konferensie in Amerika toe te spreek nie. Hoewel sy kaartjie gekoop was, het die skip sonder hom vertrek. So het J Stuart Holden ‘n gulde beroepsgeleentheid gemis. Die toegewyde eggenoot het sy vrou versorg en probeer om nie te dink aan die geleentheid wat hy misgeloop het nie.
Ons is te maklik teleurgesteld wanneer ons planne nie uitwerk nie; te maklik ontmoedig wanneer ons “wonderlike beroepsgeleenthede” misloop. Deur te kla bevestig ons dat ons God nie ken soos wat ons beweer ons doen nie. Vertraging is meestal net die beskermende hand van ‘n liefdevolle Vader. Dit was beslis so vir Holden. Tot die dag van sy dood het hy nooit weer God se tydsberekening bevraagteken nie. Die ongebruikte kaartjie was vir die nuwe luukse skip – die H.M.S Titanic!
Kopiereg 2009 Radiokansel
