As ons behoefte aan ‘n verhouding met God so diep is, hoekom misluk ons so dikwels in die nastreef daarvan? Een rede is dat ons dink dat Hy ons al die kwaad van die verlede toereken, en ons nou ook baie vinnig veroordeel. Dit is nie so nie. Dink aan ‘n beste vriend: hy aanvaar jou en bestee tyd saam met jou; jy voel altyd beter nadat jy by hom was. God bied jou vandag presies dít wat jy in ‘n beste vriend waardeer aan. Hy verlang selfs meer as jy dat jy aan Sy liefde verbonde bly. ‘Soos die Vader My liefhet, het Ek julle ook lief. Julle moet aan my liefde verbonde bly.’ As ons regtig aan Sy liefde verbonde was, sou ons só gekoester gevoel het, dat ons ons elke dag sou terughaas na Hom toe.
Die woord ‘verbonde’ beteken tuis voel in God se liefde; om oortuig te wees van jou plek as gewaardeerde lid van Sy familie; om daar vrede te ondervind; om deur Sy nabyheid gevoed, vertroetel en beskerm te voel omdat jy besef dat dit vir jou die veiligste plek op aarde is. In verbondenheid soek jy na, dors jy na, verlang jy na, wag jy en reageer jy op Hom, sien, hoor en ken jy Hom, en het jy Hom lief. Verbonde beteken meer van Hom in jou aktiwiteite, gedagtes en begeertes. Ons is té dikwels so besig om iets vir Hom te doen, dat ons nalaat om net Sy teenwoordigheid te geniet. God het ons geskape om sonder Hom onvolmaak te voel. Dit is waarom Dawid geskryf het, ‘Soos ‘n wildsbok smag na water, so smag ek na U, o God.’ (Psalm 42:1 NLV).
Bron : Radiokansel
