Elke heilige was eens ‘n kind; so ook elke krimineel. Waarin lê die verskil? Bo aan die lys – is die invloed van ‘n ouer! Samuel was vir veertig jaar profeet vir die volk Israel. Hy het Dawid as koning gesalf en hom met sy belangrikste besluite gehelp. Wie het egter die grootste invloed op Samuel se eie lewe gehad? Sy moeder Hanna. Met sy geboorte het Hanna gesê: ‘Ek het die Here gevra om my hierdie kind te gee en Hy het my gebed verhoor. Nou gee ek hom terug vir die Here. Hy sal lewenslank aan die Here behoort …’ (1 Samuel 1:27-28 NLV). Moenie ooit die krag van die gebed van ‘n ouer onderskat nie.
Slegs God weet hoeveel gebede op hierdie oomblik verhoor word van ‘n ouer wat lank gelede namens ‘n kind gebid het. As jy nie tyd het om vir jou kinders en kleinkinders te bid nie, is jy met te veel dinge besig! Niks is meer belangrik as die tyd wat jy om hulle onthalwe saam met God is nie. Dis nooit te laat nie, selfs nie vir die kind wat vir jou net trane en hartseer veroorsaak het nie. Jesus se moeder moes toekyk hoe haar seun gekruisig word, maar het ook die vreugde van Sy opstanding beleef. Jy mag inderdaad na jou graf gaan sonder om te weet of jou gebede beantwoord is, maar moet nooit, nooit ophou bid nie, want: a) God se tydsberekening is anders, dis nie ons s’n nie; b) Sy weë en metodes is ver verhewe bo ons s’n; c) Wanneer ‘n ouer bid – tree God op!
Bron : Radiokansel
