Johannes skryf, ‘…[Marta en Maria] het iemand na Jesus gestuur om te sê: “hy vir wie U lief is, is siek”‘ (NLV). Iemand het om Lasarus se ontwil na Jesus gegaan en Hy het gereageer. Die genesing het weliswaar eers later plaasgevind, maar het begin die oomblik wat Hy aangeroep is. Het jy al ooit gewonder waarheen jou gebede gaan? ‘…daar [het] stilte in die hemel neergedaal, ‘n engel het by die altaar gaan staan. Hy het ‘n goue wierookbak vasgehou met die gebede van almal wat aan God toegewy is, en dit op die goue altaar [ge]offer, die reukwerk met die gebede het opgestyg voor God.’ (Openbaring 8:1-4). Hoekom was daar stilte in die hemel? Want iemand was besig om te bid!
Die hemel word stil om na die gebede van iemand soos jy te luister. Die gebede van ‘almal wat aan God toegewy is’, styg na Hom op. Jou woorde styg op totdat hulle God bereik, moet dus nie ophou bid nie. Let op dat die persoon wat na Jesus gestuur is, gesê het, ‘”hy vir wie U lief is, is siek.”‘ Sy appèl het nie op die gebrekkige liefde van die sieke nie, maar op die volmaakte liefde van Jesus berus. Hy het nie gesê, ‘Die een wat u liefhet, is siek’ nie, maar wel, ‘hy vir wie U lief is, is siek.’ Wat ‘n verskil! Die krag van die gebed berus nie op die deugsaamheid van die een wat bid nie, maar op die onveranderende liefde van die Een wat die gebed aanhoor. Is dit nie wonderlik nie? Jy kan dalk vol gebreke wees, nie eens die misterie van gebed begryp nie, maar dis duidelik: optrede begin in die hemel wanneer iemand op aarde bid.
Bron : Radiokansel
