ImageChuck Swindoll skryf: “Die ski-hange was in die perfekte toestand. Ek het met ‘n positiewe houding opgedaag vir my eerste ski-probeerslag, terwyl ek gedink het: “Ek gaan die eerste persoon wees wat leer ski, sonder om te val.” Het jy al gehoor van die Olifantman? Op ski’s is ek die Renosterman. Ek twyfel dat enigiemand op meer maniere met die hang kan afkom, in meer posisies kan land of meer kreatiewe goed in die lug kan doen voordat hulle land.

Op hierdie mees vernederende dag in my lewe, het die wêreld se bemoedigendste ski-instrukteur (ja, ek het ‘n instrukteur gehad!) saam met my gewerk. Sy het die heeltyd kalm gebly, nooit vir my gelag of gesê: “Jy is onmoontlik! Ek bedank!” nie. Daardie liewe, minsame dame het my meer kere opgehelp as wat ek kan tel. Sy het dieselfde beginsels oor en oor herhaal – asof sy dit nog nooit vantevore gesê het nie. Alhoewel ek kouer gekry het as ‘n Suidpoolreisiger, geïrriteerd, ongeduldig en meer dikwels onder die sneeu as bo-op dit was, het sy aangehou om my gerus te stel.

Daardie dag het God vir my ‘n onvergeetlike illustrasie gegee van die waarde van bemoediging. Sonder haar woorde en gees, sou ek beslis my ski’s opgehang het, teruggegaan het na die hut toe, en kort voor lank voor ‘n knetterende vuurtjie gesit het en my voete warm gemaak het. Wat een maal per jaar geld vir ‘n beginner op die sneeu, geld elke dag vir die mense wat ons ontmoet. Hulle word bestook met eise en spertye, gewond deur kommer, teëspoed en mislukking, afgebreek deur ontnugtering en oorwin deur sonde, en lewe êrens tussen volslae ontnugtering en loutere paniek. Ons elkeen het bemoediging nodig en die mooiste deel van bemoediging is: Enigiemand kan dit gee!”

© Kopiereg 2007 Radiokansel www.radiokansel.co.za

Scroll to Top