Wernher von Braun, die eerste direkteur van NASA se Marshall Space Flight Centre, wat as die vader van die Amerikaanse Ruimteprogram bekend staan, het in ‘n artikel wat in Mei 1974 gepubliseer is, gesê: “‘n Mens kan nie aan die wet en orde van die heelal blootgestel word sonder om te redeneer dat daar ‘n ontwerp en doel daaragter is nie. Hoe beter ons die kompleksiteit van die heelal verstaan, hoe meer rede het ons gevind om die ontwerp daarvan te bewonder. Om net te glo dat alles per toeval gebeur, is in stryd met die objektiwiteit van die wetenskap.
Watter willekeurige proses kon die mens se brein of die stelsels in die mens se oë meebring? Evolusioniste daag die wetenskap uit om te bewys dat God bestaan… Hulle sê hulle kan nie ‘n ontwerper visualiseer nie; maar kan ‘n fisikus ‘n elektron visualiseer? Watter vreemde denkpatroon laat party fisici glo dat die onsigbare elektron werklik bestaan, maar hulle weier om te glo dat daar ‘n ontwerper is, bloot omdat hulle Hom nie kan sien nie?”
Die godsdienstige publikasie wat jy lees het nie tot stand gekom as gevolg van ‘n ontploffing in die drukkery nie. As daar ‘n boek is, moet daar ‘n uitgewer wees. As daar ‘n gebou is, moet daar ‘n argitek of ‘n bouer wees. “Kyk op na die hemel: wie het die sterre geskep? Hy wat die hemelse leër laat uittrek in hulle volle getal, dit is Hy wat hulle elkeen gemaak het. Met Sy groot krag, Sy groot mag, sorg Hy dat geeneen van hulle ontbreek nie.” (Jesaja 40:26 NV).
Bron : Radiokansel
