Ons sien dikwels nie die vervulling van God se beloftes in ons lewens nie, omdat ons nie die proses raaksien nie. Dit is tydens die proses op pad na vervulling dat ons moed verloor en tou opgooi. Sukses in enige onderneming berus op uithou en aanhou, selfs wanneer ander opgee. Ons verwag kits bevrediging, en wanneer dit nie gebeur nie, bedank ons uit ons werk, verlaat ons gemeentes en selfs ons gesinne. Hoe diep ons geloof ook al is, is daar ‘n proses wat deurgaan moet word; daar is nie kortpaaie nie. Uithouvermoë is die prys vir prestasie: ‘…want as ons nie tou opgooi nie, sal ons op die regte tyd oes.’ (Galasiërs 6:9 NLV).William Wilberforce het jare lank geveg om slawehandel afgeskaf te kry. Hy was op die punt om tou op te gooi, toe sy vriend, John Wesley, op dié se sterfbed, die volgende aan hom skryf: ‘Tensy jy geroepe is om hierdie spesifieke doel te bereik, sal jy deur die teenstand van mense en duiwels uitgemergel word. Maar as God vir jou is, wie kan teen jou wees? Is hulle miskien magtiger as God? Moenie moeg word van goed doen nie! Gaan voort, in die naam van God en in Sy krag totdat selfs Amerika se slawerny voor Hom swig.’ Wesley sterf ses dae later. Wilberforce het nog 42 jaar lank sy stryd voortgesit en slegs drie dae voor sy dood is slawerny in Brittanje afgeskaf. Uiteindelik is dit ook in Amerika afgeskaf. Hou uit – wat God vir jou toekoms beplan, is enige prys werd.
Bron : Radiokansel
