Wat Moses oorkom het (1)

Jou lewensverhaal is een van risiko – risiko’s wat jy geneem en vermy het. Kyk maar na Moses. Dink jy ons sou sy naam vandag nog onthou het as dit nie was dat hy risiko’s geneem het nie? Kyk net na wat hy oorkom het:

(1) Gemak! Gemak kan ‘n groter bedreiging vir vooruitgang wees as teëspoed. Nadat Moses Egipte verlaat het, het hy 40 jaar lank skape opgepas in Midian. Hy het met een van Jetro se dogters getrou en die familiebesigheid oorgeneem. Omdat Jetro nie seuns gehad het nie, het Moses sy erfgenaam geword. Stel jou voor om al hierdie dinge agter te laat en terug te gaan om die Farao aan te durf? Toe lei hy 2 miljoen mense, wat aanhoudend kla, deur die wildernis. God se plan is altyd lonend, maar nie altyd maklik nie!

(2) Onsekerheid! Toe God vir Moses geroep het, het hy baie vrae en twyfel gehad. “Maar wie is ek dan?” (Eks 3:11 NLV) “Wat moet ek dan vir hulle sê?” (Eks 3:13 NLV) “Hulle sal my nooit glo nie!” (Eks 4:1 NLV). “Ag, Here, ek is nie goed met my mond nie.” (Eks 4:10 NLV). Uiteindelik het hy gepleit, “Here, stuur asseblief tog iemand anders.” (Eks 4:13 NLV). Maar God wou nie ‘nee’ as ‘n antwoord aanvaar nie. Moses moes God gehoorsaam – God, wat elke detail van ons toekoms ken. Deurdat hy gehoorsaam was, is Israel uit die hand van die Farao gered, en is Moses se naam in die geskiedenis vasgelê.

Kopiereg 2009 Radiokansel