Die waarheid is dat ondervinding duur is. Jy kan nie ondervinding kry sonder om ‘n prys te betaal nie. Jy kan slegs hoop dat die prys nie hoër is as die waarde daarvan nie. Soms weet jy eers ná die ondervinding wat die waarde daarvan gaan wees. Dit is egter nóg duurder om nie deur jou ondervinding te leer nie. Dis tragies om die prys vir ondervinding te moet betaal maar niks daaruit wys te word nie. Dit is egter wat dikwels gebeur. Ons wil van ‘n negatiewe ondervinding weghardloop en sê, ‘Ek sal dit nooit weer doen nie.’ Moet egter nie weghardloop nie, bepaal die waarde daarvan vir jou en leer daaruit.
Onthou, waardevolle ondervinding laat jou bo die groep uitstyg. Mense wat daarvan ‘n gewoonte maak om oor hulle belewenisse na te dink en daaruit te leer, is dun gesaai. Maar jy weet dadelik wanneer jy só iemand ontmoet. Daar is ‘n storie van ‘n jakkals, ‘n wolf en ‘n beer wat saam gaan jag het. Nadat elkeen ‘n bokkie gevang het, het die beer aan die wolf gevra hoe hulle die buit moes deel. Die wolf het geantwoord, ‘Elkeen kry een bokkie.’ Waarop die beer die wolf terstond verslind het. Daarna vra die beer aan die jakkals wat hý dink. Die jakkals het sy bokkie vir die beer aangebied en voorgestel dat die beer die wolf se bokkie ook moet kry. ‘Wie het jou wysheid geleer’, vra die beer. ‘Die wolf’, het die jakkals geantwoord. Die skool van die lewe bied aan ons beplande, asook onverwagse ‘kursusse’. Al hierdie kursusse kan waardevolle lesse inhou, maar slegs as ons wil leer en daaroor wil nadink.
Bron: Radiokansel
