Wees maar eerlik. God kompeteer met materialisme in meeste van ons se lewens. Maar dit is moontlik om jouself mettertyd daarvan te bevry. Outeur John Ortberg skryf: “Soms tydens my optredes, doen ek ‘n klein oefening met mense. Ek vra hulle om hul beursies uit te haal. Dit lyk net soos ‘n stukkie leer, maar in werklikheid is dit die nuwe tempel van die 21ste eeu. Meeste mense glo dat hul geluk direk gekoppel is aan die inhoud van hierdie klein houertjies, waar die geldgod woon. Ons gee die stukkie leer die mag om ons geborge, suksesvol en van waarde te laat voel. Dis vir ons baie moeilik om die stukkie leer prys te gee. Eintlik is die vraag:
Wie is in beheer? Hou jy hom vas of hou hy jou vas?
So, om die eerste baba-treetjie te illustreer, vra ek die mense dan om hul beursies vir die persoon langs hulle te gee. Op hierdie oomblik het ek skielik almal in die gehoor se volle aandag! Dan kondig ek kollekte-tyd aan. Ek moedig mense aan om met oorgawe te gee. Op hierdie punt vat almal vinnig hulle eie beursies terug. Dan vra ek mense om vandag te verklaar tot ‘genoeg-dag’: Wat ek vandag besit – werk, huis, besittings en lewenstyl – is genoeg. Ek vra die mense om vandag op hulle kalenders aan te dui as dié dag waarop hulle opgehou het om met die bure te kompeteer. Jy sien, dit is nie meer nodig nie, want saam met God wen ons almal!”
Bron : Radiokansel
