Verbeel jou ‘n samelewing waar mense wat owerspel gepleeg het, ‘n rooi letter om hul nek moes dra, of diewe kettings om hul enkels. Stel jou voor jy word slegs deur jou verlede geken en gebrandmerk. Jy mag sê: “Hulle verdien dit waarskynlik”. Regtig? Jesus sê dat as jy met wellus na iemand van die teenoorgestelde geslag kyk, jy reeds in jou hart owerspel gepleeg het! (Matteus 5:28). Eina! Dan sê Hy verder dat jy met dieselfde maatstaf waarmee jy ander oordeel, geoordeel sal word (Matteus 7:1-2). Kan jy daarmee saamleef? God neem sonde nie ligtelik op nie. Sy liefde vir jou vrywaar jou nie van die gevolge van jou sonde nie. “Die Here dissiplineer juis die mense vir wie Hy lief is.” (Hebreërs 12:6 NLV). Maar in Sy liefde, sal Hy jou ook nie opgee nie. “Niks kan ons ooit van Christus se liefde skei nie.”(Romeine 8:38-39).
Wanneer iemand ons seermaak of ontstel, sê God: “Vergewe en druk ‘delete’!” Anders bly jy vasgevang in die herinneringe en sal dit jou stelselmatig vernietig.
“Maar dit is moeilik om te vergewe”, sê jy. Natuurlik. Dit is hoekom Jesus gesê het: “Bid vir dié wat julle vervolg” (Sien Mattheus 5:44). Om hulle te kan vergewe, moet jy eers vir hulle bid. “Maar ek moet eers probeer verstaan hoekom hulle dit gedoen het.” Slim mense doen dom dinge. Goeie mense doen slegte dinge. Dit is hoekom Jesus gebid het: “Vader, vergewe hulle, want hulle besef nie wat hulle doen nie” (Lukas 23:34 NLV). Jy mag dalk eendag verstaan, of nooit nie. Dit maak nie regtig saak nie. Vir jou eie onthalwe moet jy vergewe, vergeet en aanbeweeg!
Bron : Radiokansel
