shroud2112DEN HAAG. – Die beeltenis op die sogenaamde Turynse Doodskleed, waarin die lyk van die gekruisigde Jesus volgens oorlewering gewikkel was, kon net deur ’n kort, intense uitbarsting van ultraviolet-straling veroorsaak gewees het.

Die kleed kan onmoontlik ’n Middeleeuse vervalsing wees, soos sommige sê. Dit kan moontlik eg wees.

Kort voor Kersfees is dít die versigtige bevinding van ’n groep Italiaanse wetenskaplikes ná jare se navorsing en eksperimente. Hulle werk by die Italiaanse nasionale agentskap vir nuwe tegnologieë, energie en volhoubare ekonomiese ontwikkeling.

In 1988 het ’n ander groep wetenskaplikes enkele rafels van die kleed aan koolstof-40-toetse onderwerp en bevind dat dit van tussen 1260 en 1390 dateer. Dié gevolgtrekking is daarna bevraagteken op grond daarvan dat die rafels deels afkomstig was van Middeleeuse herstelwerk aan die kleed ná ’n brand.

Die Italiaanse wetenskaplikes het jare lank probeer vasstel hoe die vae vlekke op die kleed, wat saam die beeltenis van ’n gekruisigde man weergee, ontstaan het. Hulle het vergeefs tegnologieë wat in die Middeleeue bekend was, probeer naboots.

Die enigste manier waarop hulle iets soortgelyks kon dupliseer, was deur mikrosekondes lange energie-uitstraling van hoë-intensiteit ultraviolet-lasers.

“Die resultate wys dat ’n kort en intense uitbarsting van gerigte ultraviolet-straling ’n linnedoek kan kleur op ’n manier wat baie van die sonderlinge eienskappe van die liggaamsbeeld op die Turynse Doodskleed reproduseer.” Hulle praat van “’n vorm van elektromagnetiese energie (soos ’n ligflits op ’n baie kort golflengte)”.

Luidens die verslag het dié tegnologie nie in die Middeleeue bestaan nie en dié “mate van krag kan nie gereproduseer word deur enige normale ultraviolet-bron wat tot dusver gebou is nie”.

Die leier van die span, dr. Paolo di Lazzaro, het luidens berigte in die Europese media gesê: “As wetenskaplikes kyk ons slegs na verifieerbare wetenskaplike prosesse. As ons gevolgtrekkings ’n filosofiese of teologiese debat uitlok, sal ons dié gevolgtrekkings aan die deskundiges oorlaat; aan elkeen se eie gewete.”

Prof. Luigi Garlaschelli, hoogleraar in chemie aan die Universiteit van Pavia, het aan The Independent gesê: “Die implikasie is...dat die beeltenis gevorm is deur ’n uitbarsting van ultraviolet-energie wat só intens is dat dit slegs bonatuurlik kan wees.”

- Volksblad