Pretoria - Tientalle plakkers in die ooste van Pretoria gaan later vandeesmaand NG-lidmate word.

Na verwagting kan soveel as 80 mense uit plakkerskampe in die omgewing later vandeesmaand in die NG gemeente Moreletapark gedoop word.

Dit is die vrug op ’n bediening onder plakkers in die omgewing wat sedert vroeg verlede jaar deur mnr. Alvar Olivier, lidmaat van Moreletapark, gelei word.

Olivier raam daar kan sowat 5 000 plakkers in die ooste van Pretoria wees. Hulle bly versprei op sowat tien verskillende plekke in die veld. Olivier-hulle het begin deur in die kampe in te gaan om verhoudings te bou en te hoor watter nood die mense het.

Daarop het hulle begin om hulle kos te gee – “omdat die Bybel so sê”.

Aanvanklik het hulle op klein skaal rys en blikkies vleis uitgedeel. Deesdae is dit veral mieliemeel en soja.

Ná twee maande het hulle saam met die mense begin sing en bid en algaande het die geestelike bediening uitgebrei.

Vandag is daar ’n herder vir elke plakkerskamp waar hulle betrokke is en daar word gereeld op Sondae dienste in die veld gehou.

Maandagaande word daar verskillende Jesus-flieks in ’n tent op Moreletapark se terrein vertoon en dit word deur gemiddeld 350 mense op ’n slag bygewoon.

Aan die einde van die byeenkomste is daar onder andere tien plakkers wat ’n evangelisasiekursus gedoen het, wat gereed is om geestelike gesprekke met die mense te voer.

Olivier het die organisasie Cross of Hope op die been gebring wat met verskeie kerke en ander organisasies in die omgewing hande vat in hul evangelisasiewerk.

Hy sê daar is reeds drie groepe plakkers by die Doxa Deo-kerk gedoop. Hulle skakel in by die bedieninge in die veld.

Hierdie is die eerste keer dat hulle by Moreletapark doop.

Daar word volgende naweek ’n doopkursus aangebied vir mense met wie hulle al ’n pad stap en hulle sal dan die volgende naweek gedoop word.

Ds. Elza Meyer van Moreletapark sê diegene wat gedoop word, word volledige lidmate van die NG gemeente Moreletapark. Hulle skakel reeds in by die Shining Light-dienste wat dié gemeente vir Afrika-taal-sprekers aanbied.

Neels Jackson - Beeld